ماہر امراض اطفال ڈاکٹر آفاق احمد نے فالج کے حوالے سے بات چیت کرتے ہوئے کہا کہ لوگوں کی بڑی تعداد فالج کے حملے سے ہلاک ہوتی ہے۔ فالج سے ہلاک ہونے والے زیادہ تر افراد 40 سال سے اوپر کی عمر کے ہوتے ہیں۔ فالج کی بڑی وجوہات میں ذیابیطس اور بلند فشار خون ہیں، کم عمر افراد میں دماغ کی شریانوں میں بناوٹ کی خرابی اہم وجہ بنتی ہے جس کی وجہ سے شریانیں پھٹ یا سکڑ جاتی ہیں، فالج کے حملے میں فوری موت دماغ میں زیادہ مقدار میں خون بہہ جانے یا سانس اور دل کے نظام کو کنٹرول کرنے والے اہم مراکز کے کام چھوڑ دینے کی وجہ سے ہوتی ہے، فوری حملے سے بچ جانے والے افراد کی موت آگے جا کر ڈبل نمونیہ، پیشاب بند ہو جانے یا پشت میں زخم کی وجہ سے جسم میں زہر پھیلنے سے ہوتی ہے، فالج کا حملہ ہونے کے بعد افاقہ 10 سے 50 فیصد تک ہوتا ہے جو ایک سال کے عرصے میں مکمل ہو جاتا ہے۔ ڈاکٹر آفاق احمد کے مطابق اس لئے ایک سال گزرنے کے بعد جعلی معالجوں کے چکر میں پڑنے کے بجائے صبر کرنا بہتر ہوتا ہے۔ بچاؤ میں بلڈپریشر اور شوگر کا کنٹرول اہم ہے۔ کھانے میں چکنائی، نمک اور مٹھائی کا استعمال کم کرنا مفید ہے۔